سرورکائنات سے عشق اور ایمان کا سب سے میٹھا ذائقہ

شرحِ کلامِ رضا:

اعلیٰ حضرت رحمۃ اللہ علیہ فرماتے ہیں: میں اہلِ دولت کی مدح سرائی کیوں کروں؟ میں تو اپنے آقائے کریم صلی اللہ علیہ وآلہ وسلم کے در کا گدا ہوں۔ میرا دین دنیاوی منفعت یا “پارۂ ناں” نہیں کہ جس کے لیے میں مالداروں کی خوشامد کرتا پھروں۔ میری نسبت، میری غیرتِ ایمانی، اور میری وفا صرف حضورِ اقدس صلی اللہ علیہ وآلہ وسلم کے ساتھ وابستہ ہے۔

اعلیٰ حضرت رحمۃ اللہ علیہ کا کمالِ عشقِ رسول صلی اللہ علیہ وآلہ وسلم

’’اگر کوئی میرے دل کے دو ٹکڑے کر دے تو ایک پر لا اِلٰہَ اِلَّا اللہ اور دوسرے پر محمدٌ رسولُ اللہ صلی اللہ علیہ وآلہ وسلم لکھا ہوا پائے گا۔‘‘

یہ جملہ دراصل اس حقیقت کی عکاسی ہے کہ آپ کے نزدیک توحید اور رسالت ایک ہی ایمان کی دو روشن تجلیاں ہیں، اور آپ کا قلب ان دونوں انوار سے معمور تھا۔

مفتی اعظم ہند مولانا مصطفی رضا خان رحمۃ الله علیہ ” سامان بخشش “ میں فرماتے ہیں:

خدا ایک پر ہو تو اک پر محمد

اگر قلب اپنا دو پارہ کروں میں

مشائخ زمانہ کی نظروں میں آپ رحمۃ اللہ علیہ واقعی فنافی الرسول تھے۔ اکثر فراق مصطفے صلی اللہ علیہ وآلہ وسلممیں نمکین رہتے اور سرد آہیں بھرا کرتے۔ پیشہ ور گستاخوں کی گستاخانہ عبارات کو دیکھتے تو آنکھوں سے آنسوؤں کی جھڑی لگ جاتی اور پیارے مصطفے صلی اللہ علیہ وآلہ وسلم کی حمایت میں گستاخوں کا سختی سے زد کرتے تاکہ وہ جھنجھلا کر اعلیٰ حضرت رحمۃ اللہ علیہ کو بُرا کہنا اور لکھنا شروع کر دیں۔

آپ رحمۃ اللہ علیہ اکثر اس پر فخر کیا کرتے کہ باری تعالی نے اس دور میں مجھے ناموس رسالت مآب صلی اللہ علیہ وآلہ وسلم کے لیے ڈھال بنایا ہے۔ طریق استعمال یہ ہے کہ بد گویوں کا سختی اور تیز کلامی سے رد کرتا ہوں کہ اس طرح وہ مجھے برابھلا کہنے میں مصروف ہو جائیں۔ اُس وقت تک کیلئے آقائے دو جہاں صلی اللہ علیہ وآلہ وسلمکی شان میں گستاخی کرنے سے بچے رہیں گے۔ حدائق بخشش شریف میں فرماتے ہیں:

کروں تیرے نام پہ جاں فدا نہ بس ایک جاں دو جہاں فدا

دو جہاں سے بھی نہیں جی بھرا کروں کیا کروڑوں جہاں نہیں

یہ ایمان افروز شعر امامِ اہلِ سنت اعلیٰ حضرت امام احمد رضا خان رحمۃ اللہ علیہ کے سوزِ عشق، والہانہ عقیدت اور انتہائے محبتِ مصطفیٰ صلی اللہ علیہ وآلہ وسلم کا حسین مظہر ہے۔ اس میں عاشقِ صادق کے قلبی جذبات، عقیدۂ محبت اور روحانی وابستگی نہایت بلیغ انداز میں جلوہ گر ہیں۔

آپ رحمۃ اللہ علیہ حضورِ اکرم صلی اللہ علیہ وآلہ وسلم کی بارگاہ میں عرض گزار ہیں کہ: یارسول اللہ صلی اللہ علیہ وآلہ وسلم! میری ایک جان کیا، دونوں جہان بھی آپ پر قربان۔ اگر کروڑوں جہان بھی ہوں تو وہ بھی نثار کرنے کو دل بے تاب ہے۔ عشق کی یہ انتہا دراصل عبدیت کی معراج ہے۔

مزید یہ کہ شاعر نے مبالغۂ عشق کے ذریعے یہ حقیقت واضح کی کہ: عاشق کے نزدیک سب سے قیمتی متاع جان ہے، مگر عشقِ رسول صلی اللہ علیہ وآلہ وسلم میں جان بھی ہیچ ہے، دنیا اور آخرت کی تمام نعمتیں بھی محبوب صلی اللہ علیہ وآلہ وسلم کی نسبت سے کم تر ہیں۔ یہ اظہار اس عقیدے کی عملی تصویر ہے کہ: محبتِ رسول صلی اللہ علیہ وآلہ وسلم ایمان کی جان اور اصلِ دین ہے۔

شاعر فرماتے ہیں:اگر دونوں جہان بھی قربان کر دیے جائیں تو بھی دل کی پیاس باقی رہے گی۔ کاش! کروڑوں جہان ہوتے تاکہ وہ سب بھی محبوب صلی اللہ علیہ وآلہ وسلم پر نثار کر دیے جاتے۔ یہ مصرعہ درج ذیل نکات کی طرف اشارہ کرتا ہے:

یعنی, حضور صلی اللہ علیہ وآلہ وسلم کی شان ایسی بلند ہے کہ:

• دو جہاں بھی کم محسوس ہوتے ہیں۔

• عاشق کا دل مزید نچھاور کرنے کو بے قرار رہتا ہے۔