مولانا الیاس قادری کی حیات وخدمات کا تحقیقی جائزہ

تبلیغی مساعی کے نتیجے میں مولانا الیاس قادری نے جب اپنے تبلیغی سفر کو ایک منظم انداز میں چلانے کےلئے حلقہ احباب کی مشاورت اور علمائے ذی وقار کی باہمی رضا مندی سے باقاعدہ بازاروں اور محلوں میں چوک درس دینے شروع کئے تو اس وقت کے پس منظر کو پیش نظر رکھ کر دیکھیں تو شہر کراچی نفرت کی آگ میں جل رہا تھا ، ایک طرف تعصب ، تفرقہ ،لسانیت اور مذہبی انتشار اور طرح طرح کے فتنوں نے فضا کو گرد آلود کردیاتھا۔تو دوسری طرف نوجوان یورپ کی تہذیب سے متاثر ہوکر بے حیائی کی طرف راغب ہورہے تھے۔ مساجد میں رسم اذان تھی پر روح بلالی خال خال تھی،نیکی کا تصور کوسوں دور ہوتا جارہا تھا، نمازی نماز پڑھتے پر نماز کے قیام کی حقیقت سے کوئی واسطہ نہ رکھتے، کہیں کہیں رسمی طور پردینی رایتوں پر عمل نظر آتا لیکن اکثریت دین سے دور معاشی آزماشوں میں مبتلا ہوتی جارہی تھی۔سوچی سمجھی سازش کے تحت علمائے اسلام کو بدنام کیاجارہاتھا، دینی اداروں کی معاشرتی اہمیت کو گھٹاکر ویران کرنے کی مذموم کوششیں جارہی تھیں اور کئی نامور اداروں کی بنیادیں سازشوں کے نتیجے میں ہل بھی چکی تھیں ،شریعت سے ورغلاکر مسلمانوں کا تعلق صاحب مکین گنبد خضرا سے توڑا جارہاتھا ، عشق مصطفی کی شمع بجھانے کےلئے اہل ایمان کے سینوں میں محبت دنیا ڈالنے کےلئے دنیاوی حرص ولالج کے اسباب مہیا کئے جارہے تھے۔ان نامساعدحالات اور بےحیائی کے دور میں شہر کراچی سے جس شخصیت نے علَمِ جہاد بلند کیا، احیائے سنت رسول کی تحریک چلائی، تبلیغ قرآن وسنت کےلئے دینی جدوجہد کی ، امت کےبکھرے شیرازےکو عشق مصطفی کی موتیوں میں پرویا،اسلام کی محبت کے دیئے جلائے، منبر ومحراب کی رونقوں کو ازسرنو بحال کیا ،نغمہ ہائے رسالت سے دلوں میں عشق ومحبت کے سوز وگداز پیداکئے، سوز وسازعشق نبی سے ویران دلوں کو آباد کیا،دنیا پرست کو دین پرست بنایا اور آوارہ مزاج لوگوں کو دین کی طرف رغبت دلانے والی ہستی کا نام مولانا الیاس قادری ہے۔

چنانچہ 1401ہجری بمطابق 2ستمبر 1981 کو مولانا الیاس قادری امر بالعمروف ونہی عن المنکر کے حکم قرآنی پر عمل کرتے ہوئے ایک عظیم مقصد " مجھے اپنی اور ساری دنیا کے لوگوں کی اصلاح کی کوشش کرنی ہے" لئے شہر کراچی سے تبلیغ قرآن وسنت کی عظیم دینی تحریک ’’دعوت اسلامی ‘‘ کا آغاز کرتے ہیں۔انیسوی صدی کی اسی کی دہائی کے حالات وواقعات کے تناظر اور اسلام کی عظمت رفتہ کو پھر سے دلوں میں اجاگرکرنے کےلئے ہرقسم کے حالات کی مخالفت لئے مولانا دین کی تبلیغ کےسفر کو ’’دعوت اسلامی‘‘ کا نام دیکر شروع کیا اور لومۃ الائم کے پرواکئے بغیر ایک ایک فرد کو دین کی دعوت دیتے ،نیکی کی رغبت دلایتے ہیں اور یوں :

میں اکیلا ہی چلا تھا جانِبِ مَنْزِل مگر

اِک اِک آتا گیا کارواں بنتا گیا

کے مصداق مولانا کی دینی جدوجہد کی انفرادی دعوت اجتماعی ماحول میں تبدیل ہوتی ہے اور موجود تاریخ اگست 2025 میں دنیا کے 150 سے زائد ممالک میں مولانا الیاس قادری کی دینی جدوجہد کےد رو رس اثرات نظرآتے ہیں ۔

اصلاحِ معاشرہ کے لیے الیاس قادری کی انفرادی و اجتماعی کاوشیں

عالمی سطح پر دین اسلام کی اشاعت اور تبلیغ اسلام کےلئے مولانا الیاس قادری کی تبلیغی جدوجہد پر نظر دوڑائے تو اصلاح معاشرے کےلئے الیاس قادری کی دینی مساعی میں دو اہم اسلوب تبلیغ نظر آتے ہیں : ایک انفرادی کوشش اور دوسری اجتماعی اصلاح۔

انفرادی کوشش

مولانا الیاس قادری نے نیکی کی دعوت کے شارعِ تبلیغ پر ایک مبلغ کی حیثیت سے قدم رکھا تومولانا نے اسلوب تبلیغ میں منہج نبوت کو ہی اپنا ماڈل بنایا۔یعنی جس طرح طلوع اسلام کے ساتھ حضور علیہ الصلاۃ والتسلیم نے تبلیغ کا آغاز کیا تو فردا فردا دین کی دعوت دیناشروع کی، انفرادی طور پر توحید کا درس دیا،ایک ایک شخص کی ذہن سازی کی، دین اسلام کی حقانیت سے واقفیت دی، عقیدہ توحیدکا بیج بونے کےلئے چیدہ چیدہ اشخاص کے سینوں کا انتخاب کیاتاکہ جب دعوت توحیدمعاشرے کے بااثر شخصیات میں راسخ ہوجائےتو ان سے منسلک لوگوں کو دعوت دینا آسانی ہوجاتی ہے۔مولانا الیاس قادری نے بھی انفرادی دعوت کی اہمیت کو پیش نظر رکھ دعوت اسلامی کا پیغام فردا فردا عام کرنا شروع، انفرادی طور پر ذہن سازی وکردارسازی پر زوردیا، حضور علیہ الصلاۃ والسلام کی سنتوں کواپنا کر ایک باعمل مخلص کردار لوگوں کے سامنے پیش کیا،دعوت عمل سے پہلے خود باعمل بن کر لوگوں کے سامنے پیش ہوئے،سادہ میٹھے، پرتاثیر لہجہ اور محبت بھرے جذبات اور عشق رسول میں ڈوب کر دعوت خیر دی، باتیں سنی ، جھڑکیاں کھائیں،لوگوں کے بےکتی باتوں کو برداشت کیا،مزاق،تمسخر کا نشان بنے،سادگی کو حرف تنقید بنایاگیا پردین کی دعوت دینا نہ چھوڑی ۔

انفرادی دعوت کےاثرات

مولاناالیاس قادری کی نیکی کی دعوت کی کامیابی میں انفرادی دعوت کو بڑا دخل ہے ممکن ہےکہ آج ہر شخص اجتماعیت میں اپنی دعوت کو دینے کا خواہشمند ہو،لیکن مولانا الیاس قادری آج بھی پیرانہ سالی کے باوجود انفرادی طور پرنیکی کی دعوت دیتے رہتے ہیں اور تبلیغ دین میں انفرادی دعوت کی اہمیت کوصفحہ قرطاس پربھی منتقل کیا، بلکہ اکبائر علما کی انفرادی جدوجہد پر کتاب بھی لکھی۔مولانا الیاس قادری کی انفرادی نیکی کی دعوت کے نتیجے میں ایسے باعمل افراد تیار ہوئے جنہوں نے مولانا کی نیکی کی دعوت کو عام کرنے میں مثالی کردار ادا کیا اور آپ کی انفرادی توجہ اور ذہن سازی سے امت کو ایسے مبلغین ملے کہ جنہوں نے اپنے مربی وشیخ کےمشن کو حرزں جاں بناکر مولاناکی دعوت کےاثرات سے دنیا کو متاثر کیا اور لاکھوں غیر مسلموں کو کو کلمہ حق پڑھا کر دین کا مبلغ بیانا۔

اجتماعی اصلاح

اخلاص وللہیت کے پیکر مولانا الیاس قادری کی نیکی کے دعوت کے اثرات جب دلوں میں راسخ ہونا شروع ہوگئے تو انفرادی نیکی کی دعو ت کے دائرہ کار کو بڑھا کر اجتماع ماحول میں تبدیل کیاگیا ۔اجتماعی اصلاح کا ماحول کیساہو ، اصلاح کے اجتماعی ماحول کےلئے جگہ کا انتخاب،اجتماع کے بیانات کے موضوعات ، لوگوں کی آمدو رفت ،ملاقاتیں وغیر لوازمات کا اتنظام وانتصرام کے لئے قدرتی اسباب مہیاہونا شروع ہوگئے ۔جب دعو ت میں سچائی ہو اور دعوت دینے والا خود باعمل ہو تو دعوت کےاثرات از خود دلوں میں قدم جمالیتے ہیں ۔یوں مولانا الیاس قادری نے اپنی دعوت کو اجتماع ماحول میں دینےکےلئے جمعرات کے دن بعد نماز مغرب ہفتہ وار سنتوں بھرے اجتماع کا آغاز کیا۔1981سے ہفتہ واراجتماع کی دھوم ایسےمچی کے آج 150 سے زائد ممالک کے سینکڑوں مقامات پر دعوت اسلامی کا ہفتہ وارا جتماع منعقد ہوتا ہے اور دعوت اسلامی کے قیام سے لیکر اب تک بغیر کسی تعطل کے حضورعلیہ الصلاۃ والسلام کی سنتوں کی تبلیغ کا پیغام انہی ہفتہ وار اجتماعات کے ذریعے کے دنیا میں جاری وساری ہے۔

قرآن وسنت کی تبلیغ اور احیائے سنت کےلئے عالمی سطح پر تربیتی نظام کا قیام

جب اللہ اپنے بندے سےکوئی اہم کام لینا چاہتاہے تو اس بندے کے ذہن کو وسعت ، نظر میں بالیدگی، فکر کو پاکیزگی، عمل کو اخلاص او ر شخصیت میں کمالات بھی ودیعت فرمادیتا ہے ۔چھٹی صدی جب میں شیخ عبد القادر الگیلانی نے اپنے تبلیغی سفر کا آغاز کیااورخطابات کے ذریعے لوگوں کو جھنجھوڑا ،معاشرے میں پھیلی بری رسم ورواج سے کنارہ کشی اختیارکرنے کا ذہن دیا ،حکمرانوں کی دینی تربیت کی اور ظلم وستم کے بازار میں صدائے محبت بلند کی تو کشاں کشاں لوگ آپ کے ہاتھ پر تائب ہوئے او ر اپنی ظاہر ی وباطنی اصلاح کی طرف متوجہ ہوئے۔اس وقت شیخ کامل نے لوگوں کی تربیت ،دائمی اصلاح ، تعلیم وتربیت اور باعمل افراد کی تیار ی کےلئے بغداد میں درس وتدریس اور افرادسازی کےلئے درسگاہ بنائی جہاں صبح وشام دین کی تعلیمات سیکھانے کا اہتمام کیاجاتااوراسی درسگاہ کے فارغ التحصیل علمااپنی ظاہری وباطنی اصلاح کےبعد وقت کے قطب بن کر تبلیغ دین کے لئے روانہ ہوئے ۔من وعن مشرب غوثیت مآب کے پروردہ جناب مولانا الیاس قادری نے اپنے روحانی شیخ کےنقش قدم کو خضر راہ بنایا اور سنت رسول کی عظیم دینی تحریک سے وابستہ ہونے والے افراد کےلئے عالمی سطح پر ایک دینی و اصلاحی تربیت گاہ دار السنہ کے نام سے بنائی جہاں شب وروز دین کی تعلیم کےساتھ اصلاح احوال اور نبی کریم صلی اللہ علیہ وسلم کی سنتیں سیکھنے سکھانے والوں کا جمع غفیر رہتا ہے۔شیخ مولاناالیاس قادری اپنے نظام تربیت کو خود اپنے ہاتھوں سے آبادکیا،اس نظام اصلاح کی آبیاری دور نبوت کی عظیم درس گاہ صفہ کےطرز پر کی ،ایک ایک فرد کےسینے میں حب نبی صلی اللہ علیہ وسلم کی چاشنی پیدا کی، معاشرے کے ناسور جرائم میں ملوث لوگوں کو دین کا مبلغ بناکر اصلاح معاشرے کےلئے تیارکئے ،فرض علوم کی اہمیت دلوں میں اجاگر کی اور علم دین کا باعمل طالب بناکر اپنے حلقہ احباب میں شامل ہونے والوں کو سنت رسول کا عامل بنایا۔

الیاس قادری نے ساری دنیا کےلوگوں کی اصلاح کےعظیم مشن کی راہ میں آنے والی ہر رکاوٹ کو پس پشت ڈالتے ہوئے اعلائے کلمۃ اللہ کےلئے دن رات محنت کی ۔اس مرد درویش نےاپنے رب کریم کی ذات پر کامل بھروسہ کیا اور متوکل علی اللہ ہوکر نیکی کی دعوت کےسفرپر تن تنہا روانہ ہوا۔رسول اللہ صلی اللہ علیہ وسلم کی نعتوں کے نغمہ گنگناتے ہوئے عشق رسول کی آگ سینوں میں بھڑکاتا رہا ،سفیدلباس، سرپرعمامہ ،جیب میں مسواک ،سیدھے سادے بول، پرتاثیر الفاظ،لہجہ میں نرمی ، شائستگی،دل میں عشق مصطفی کی آگ، چہرےپر خوف خداکے آثار،تقوی وللہیت، جوکہتااس پرعمل کی تصویر بن کر لوگوں کےسامنےاپنا کردار پیش کرتارہا، سب کی مخالفت جھیلتا رہا لیکن حضور علیہ الصلاۃ والسلام کی سنتوں کی تبلیغ میں مگن رہا اور پھر سبز سبز گنبد خضرا کے مکین کی عنایت خاص سے ایک مبلغ مصلح امت بن کر ابھرا اور امت مسلمہ کو منہج نبوت پر عالمی سطح کا نظام تربیت عطا کیا ۔حقیقت پسندی سے دیکھا جائے تو دور حاضر کے عظیم مصلح امت میں مولانا الیاس قادری کا شمار سرفہرست آتا ہے جن کی دینی کاوشوں سے پاکستان کے علاوہ 150سے زائد ممالک میں ہزاروں کی تعداد میں علم ودانش ، تعلیم وتربیت کےادارےفیضان مدینہ کے نام سے آباد ہیں ۔کراچی میں عالمی مدنی مرکز فیضان مدینہ سے دنیا کے ہر خطہ میں سنت رسو ل کی بہاریں لٹائی جارہی ہے ،جُھنڈ کے جُھنڈ قطار اندر قطار لاکھوں لوگ اس نظام تربیت سے اپنی اصلاح کا کام سرانجام دے رہے ہیں۔

عالمی سطح پر جامعات اور مساجد کا قیام

الیاس قادری کی ہمہ جہت شخصیت نے موجودہ دور میں خدمت تعلیم کا ایک نیا باب رقم کیا۔لوگوں کو دین کی دعوت دیکر انہیں تنہا نہیں چھوڑا ،نیکی کے سفر کا مسافر بن کر انہیں اکیلا نہیں کیا۔بلکہ اپنے تربیت یافتہ لوگوں کو علم دین سیکھنے کے انٹرنیشنل سطح پر موقع فراہم کیا۔ دین کی تعلیمات ، اسلامی علوم ، قرآن وحدیث ، فقہ وفتاوی،تاریخ وادب، عقائد ونظریات میں پختگی لانے کی تڑپ پیداکی اور اس مقصد کی کامیابی کےلئے اسلامی علوم وفنون سیکھنے کےلئے جامعات المدینہ اسلامک انسٹیٹوٹ آف لٹریسی کا قیام ممکن بنایا۔جامعۃ المدینہ خدمت تعلیم کا وہ عظیم ادارہ ہے جہاں دین کے ساتھ دنیاوی علوم کو بھی پڑھایاجاتاہے۔اس ادارے میں معاشرے کے معمار تیار ہوتے ہیں، مصلحین امت کی تربیت ہوتی، مبلغین کو علم شریعت سے آگاہی دی جاتی ہے، مسائل شریعت پردسترس رکھنے والے علماومفتیان تیارکئے جاتے ہیں،امت مسلمہ کو باکردار ،باعمل مخلص دینی قیادت فراہم کی جاتی ہے ۔

مولانا الیاس قادر ی کے وژن نے دنیا کو متاثر کیا اور ان کی علمی خدمات نے وطن کی سرحدوں کو پار کرکے دنیا کے بیشمار ممالک میں جامعۃ المدینہ کےنام سے تعلیم ادارے بنائے،بنگلہ دیش ، سری لنکا،انڈیا،ملائیشیا، انڈونیشیا، کولالمپور، ساؤتھ کوریا، ساؤتھ افریقہ، ملاوی، جنوبی کوریا، اٹلی ، اسٹریلیا،انگلینڈ، امریکہ ،کینیڈا، فرانس، جرمنی ، ترکیہ ، شام،عراق وغیرہ بے شمار ممالک میں مسلمانوں کی تعلیم وتربیت کےلئے جامعۃ المدینہ اسلامک انسٹیٹیوٹ قائم کئے۔ہزاروں طلبہ وطالبات کےلئے اعلی دینی تعلیمی نظام کا اجرا مولانا الیاس قادری کی دینی تحریک دعوت اسلامی کا وہ عظیم کارنامہ ہے جس کی مثال گزشتہ صدیوں میں ملنا مشکل ہے اور یہ سلسلہ تعلیم وتربیت اب بھی اپنی آب وتاب کے ساتھ علم کی سوغات تقسیم کررہا ہے۔کئی ممالک میں دعوت اسلامی کے تعلیمی ادارے قائم ہورہے ہیں۔مولانا الیاس قادری نے 44 سال پہلے جس دینی تحریک کا آغاز کیاتھا آج اس دینی تحریک کی جڑیں دنیا کے اکثر وبیشترممالک میں پیوست ہوکر مضبوط سے مضبوط سے ہوتی جارہی ہے۔اسلامی نظام تعلیم کےساتھ مروجہ دنیاوی تعلیم کی اہمیت کو بھی مولانا الیاس قادری نے نظر انداز نہیں کیا بلکہ اپنے تعلیمی ادارے میں ہر ملک کےنظام تعلیم کی سوشل ویلوز کو بھی نصاب تعلیم کا حصہ بنایااور لینگوئجز کے کورسسز کا بھی اجرا کیاتاکہ جامعۃا لمدینہ سے گریجویٹ کرنے والا طالب علم دین کی تعلیمات ہر ملک کی مقامی لینگوئج میں دے سکے ۔دعوت اسلامی کے دنیا بھر میں پھیلے تعلیمی نیٹ ورک سے آج ہزاروں علما، سینکڑوں مفتیان کرام، اسلامی اسکالرز، مذہنی رہنما، دینی شخصیات، مبلغین، معلمین، مدرسین مولانا الیاس قادری کے وژن کو متعارف کروارہے ہیں۔بلامبالغہ تعلیم کے جدید تقاضوں سے ہم آہنگ جامعات المدینہ بوائز وگرلز مولانا الیاس قادری کا وہ تاریخی کارنامہ ہے جس پر اہل اسلام کو بجاطور پر فخر ہے۔

کتب ورسائل اور میڈیا کے ذریعے مولانا الیاس قادر ی کی دینی دعوت کے اثرات

تاریخ کا اسٹوڈنٹ 20اور 21صدی کی بااثر مسلم شخصیات میں الیاس قادر ی کا نام مؤرخ، مصلح، مبلغ، رائٹر، دینی رہنما، عالمی ا سکالر، قانون دان، فقیہ ،سماجی ودینی شخصیت، ماہر تعلیم، ماہر نفسیات جس بھی فہرست میں تلاش کرے گا اسے مولانا الیاس قادری کا نام سرفہرست نظر آئے گا۔یہ کوئی خالی دعوی نہیں بلکہ اس دعوی کی حقیقت میں مولانا کی پرتاثیر شخصیت کے وہ کمالات ہیں جو دنیا کے اکثرممالک میں دعوت اسلامی کے اثرات کی صورت میں نظر آتے ہیں۔حضرت الیاس قادری کے مذہبی افکار ونظریات ، تعلیمی اثرات، روحانی کمالات نے لوگوں کی توجہ اپنی جانب مبذول کی تو دنیا نے دیکھا کہ ایک مختصر وقت میں مولانا سب کی نظر کے ممدوح بن گئے، ایک مبلغ سے امیر اہلسنت بن گئے ۔

مولاناابو بلال الیاس قادری کی پرتاثیر دینی دعوت نے عالمی سرحدوں کو عبور کیا تو مولانا الیاس قادری نے بھی اپنی دینی تحریک کے ذریعے دین کی دعوت کے سلسلہ کو دراز کیااور سرحدی حدود وقیوم کی حساسیت کو مدنظر رکھتے ہوئے کتابوں اور رسائل کی صورت میں دین کا پیغام پہنچانے کےلئے تبلیغ کی نئی اڑان لی اور دین کی دعوت تصنیف وتالیف کی صورت میں پہنچائی۔عام فہم ،سادہ الفاظ، انسانی فطرت کےقریب ، نئے اندازکے ساتھ متاثر کن موضوعات میں ایسے رسائل لکھےکہ دل خود بخود مطالعہ کےلئے للچائے،شوقِ مطالعہ کی مہمیز ازخود رسائل پڑھنے کی رغبت دلائے،ذوق مطالعہ بڑھانے کےلئے نت نئے موضوعات کےذریعے علم دین حاصل کرنے کا ذہن بنائے۔ شوقِ کتب ، ذوقِ مطالعہ جیسے اوصاف مولانا کی علمی شخصیت کا نمایاں پہلو تھا اسی علم دین سیکھنے کی وارفتگی کو دوسروں میں بیدار کرنے کےلئے علم دین کے خزانوں سے لبریز کتابیں لکھیں۔

کتب کی نشرو اشاعت کےلئے جدیدپبلشنگ ہاؤس کاقیام

سوشل میڈیا ٹی وی چینل کےذریعے دین کی تبلیغ

کتاب ورسائل کےعلاوہ مولانا الیاس قادری نے عالمی سطح پر دین کا پیغام پہنچانے کےلئے دور جدید کے تقاضوں سے ہم آہنگ میڈیا کا بھی بھرپور استعمال کیا تاکہ دین کے دعوت براہ راست دنیاکے ہر خطہ کے لوگوں تک پہنچ جائے۔مولانا الیاس قادری نے اپنی دینی دعوت کے پیغام کو چینل کے ذریعے پہنچانے کا عزم کیاتو چینل کے تقاضوں کو پورا کرنابھی ایک کار مشکل تھا اس اہم کام میں بھی قدرت کا خاص کرم ہوا ۔تقریبا سترہ سالوں سے ایک اسلامی مدنی چینل جو بغیر کسی اشتہار کے کامیابی سے دین کی دعوت کا پیغام اردو ،انگلش ، بنگلہ اور عربی زبان میں دنیا کےہر مسلم وغیر مسلم کو دے رہا ہے ۔اس مارکٹنگ کے دور بے حیائی میں دین کے باتیں ٹی وی چینل کےذریعے وہ بھی بغیر کسی اشتہار اور ایڈواٹائزمنٹ کے لوگوں تک پہنچانا اس دور میں مولانا کی کرامت ہے جو بفضل الہی مدنی چینل کی صورت میں نظر آتی ہے۔

مولاناالیاس قادری درحقیقت نباض عصر شخصیت کے مالک ہیں جنہوں نے اپنی دینی تحریک دعوت اسلامی کو دنیا کے ہر خطہ میں متعارف کروانے اورفروغ علم دین کےلئے کوئی دقیقہ فروگزاشت نہ کی۔ بلکہ عمل پیہم، عزم مصم، یقین کامل کے ساتھ خوف خدا وعشق رسول کو اسلوب زندگی بناکر دوسروں کی دینی واخلاقی اصلاح کا کام بخوبی سرانجام دے رہے ہیں ۔یہی وجہ ہے کہ عالمی سطح پر دعوت اسلامی کو پزیرائی ملی اور مولنا الیاس قادری کی دینی دعوت کے اثرات سے مسلم وغیر مسلم سبھی متاثر ہوئے اور سلسلہ دعوت کو اگر یورپ اورافریقی مالک میں ناقدانہ نظروں سے دیکھیں تو مولانا کی دینی دعوت کے اثرات غیر مسلموں کو بھی دین کے قریب کررہے ہیں۔

عالمی سطح پر دعوت اسلامی کی پزیرائی اور دینی شعور کی بیداری

منصہ شہود پر 981 1میں مولانا الیاس قادری کی تبلیغی زند گی کا آغاز ہوا اور تقریبا 45سال کا عرصہ مکمل ہوگیا۔ اس دوران مولاناالیاس قادری کی دینی تحریک دعوت اسلامی کے خد وخال اور اثرات عالمی سطح پر دیکھیں توہمیں 150ممالک میں فیضان مدینہ تبلیغ قرآن وسنت کےمراکز، جامعۃ المدینہ اسلامک ایجوکیشنل انسٹیٹیوٹ ، دار المدینہ اسلامک اسکولنگ سسٹم، مدارس المدینہ قرآن ایجوکیشنل انسٹیٹیوٹ، مساجد، فلاحی ادارے ایف جی آر ایف، سماجی ودینی کام، مبلغین، معلمین، اسکالز کی کثیر تعداد دین کا کام کرتے ہوئے دکھلائی دیتی ہے۔ہر ورز غیر مسلموں کی بڑی تعدا د دعوت اسلامی کے مبلغین کی کاوشوں سے حلقہ بگوش اسلام ہورہی ہے ،قرآن کی تعلیم اور دینی تربیت کےنئے ادارے اور مساجد تعمیر کئے جارہے ہیں۔یورپ، امریکہ ،براعظم افریقہ، شمالی افریقہ، مڈل ایسٹ مشرقی وسطی، ایشیائی ممالک، عرب وعجم ،مشرق ومغرب میں دعوت اسلا می کے دینی کاموں میں شب وروز تیزی آرہی ہے۔ مولانا الیاس قادری عطاری صاحب کی تبلیغی کاوشوں سے تقریبا 150 سے زائد ممالک میں دینی تحریک دعوت اسلامی کو دینی سماجی، تعلیمی، اخلاقی خدمات پر عالمی سطح پر پزیرائی ملی رہی ہے۔

لاکھوں کی تعداد میں مرید ین ، محبیین ،متوسلین دنیا میں دعوت اسلامی کا کام دین رات کررہے ہیں۔مولانا الیاس قادری کے اصلاح تاریخی کار ناموں کی وجہ سے علمائے اسلام نے آپ کی امیر اہلسنت، شخ طریقت، مبلغ اسلام، دینی اسکالر، مفکر اسلام جیسے القابات عطاکئے۔ دعوت اسلامی کا قیام اور اس کے دینی اثرات کی عالمی سطح پرپزیرائی مولانا الیاس قادری کی دینی دعوت کی کامیابی کا نہ صرف منھ بولتا ثبوت ہیں بلکہ آج کہیں بھی دینی شعورکی بیداری دیکھنے کو ملتی ہے تو اس تحریک کے عوامل میں مولانا الیاس قادری کی دینی جدوجہد کےاثرات نمایاں طور پر نظر آئیں گے۔

سلسلہ کلام کا اختصار

مولانا الیاس قادری کی حیات وخدمات میں نمایاں امتیاز آپ کی شخصیت کا معتدل ہونا ، ہر کام میں اعتدال پسندی، حکمت ، تسلسل ،اخلاص اور للہیت ہے۔آپ سبسے بڑ اوصف علمائے کی رائے کا احترام اور تبلیغی زندگی میں لفظی غلطی پر اصلاح پرشکریہ ادا کرکے اصلاحی پہلو کومقدم رکھنا ،سبقت لسانی یا درس وتدریس کے دوران کسی بھی مسئلہ میں علمائے اسلام مفتیان کرام کی رائے کو فوقیت دینا شامل ہے۔

مولانا الیاس قادری کی کامیابی کا راز بھی سنت رسول کی پاسداری کے عمل میں مضمر ہے۔اور سنت رسول پرپابندی کی برکت سے آپ نے دعوت اسلامی کے پلیٹ فارم پر جو دینی جدوجہد کاآغاز کیا اس کادائرہ کار دنیا کے بیشتر ممالک میں پھیل چکا ہے ۔آپ نے امت کو ایسا منہج پلیٹ فارم عطا کیا جس میں دعوت دین ، علم دین، اصلاح معاشرہ ، معاشی اصلاحات ومالیاتی نظام کا ڈھانچہ، تربیت افراد، تہذیب نفس، اخلاقیات، تعلیم وتربیت کانیکی دعوت کےساتھ مربوط اور مضبوط تعلق قائم کیاگیا۔ اور اس مربوط نظام کے بنیادی ستون قرآن وسنت کی پابندی، شریعت اسلامیہ کی پاسداری ، اسوۂ رسول سے وابستگی ، سنت نبوی کے عملی اطلاقات اور امت کی خیر خواہی مقرر کئے گئے ہیں۔

دعوت اسلامی کا سنتوں کی تربیتی کا اجتماعی نظام ، تعلیم وتربیت کے ادارے، درس وتدریس کے تبلیغی میدان ، اصلاح معاشرہ کا بین الاقوامی تربیت پلیٹ فارم اور میڈیا کی تیز رفتار دوڑ میں اسلامی میڈیا کا تعارف اور جدید ذرائع ابلاغ کےساتھ دین کی تبلیغ کو عصرحاضر کے تقاضوں سے ہم آہنگ کرنا مولاناالیاس قادری صاحب کی دعوت کی اثر پزیری میں سب سے بڑا محرک ثابت ہوا۔میڈیا رینکنگ میں مدنی چینل کی ٹاپ چینلز میں شامل کرلیا گیا باوجود یہ ہےکہ اس چینل کے پلٹ فارم پر تاحال صنف نازک کی جھلک بھی نہیں دیکھی گئی۔

المختصر مولانا الیاس قادری کی حیات وخدمات اس بات کا ثبوت ہےکہ خلوص نیت، صحیح اور درست منہج اورلگاتار محنت کےساتھ کی گئی نیکی کی دعوت کےاثرات نہ صرف افراد تک محدود ہوتے ہیں بلکہ آنے والی نسلیں بھی دینی دعوت کے پائیدار اثرات سے متاثرہوتی ہیں۔اور مولانا الیاس قادری کی نیکی کی دعوت کے اثرات نے ثابت کیا کہ آپ کی دعوت دین نے نہ صرف افراد کو بدلا بلکہ معاشرے کی سمت بھی بدل ڈالی ۔ اللہ تعالیٰ آپ کی مساعیِ جمیلہ کو شرفِ قبولیت عطا فرمائے اور امتِ مسلمہ کو آپ کی خدمات سے مزید مستفید ہونے کی توفیق نصیب فرمائے۔ آمین۔